Ditën e sotme është mbajtur një Kuvendi i Jashtëzakonshëm i FC Prishtinës, ku Rrahman Haradini tashmë është aksionari më i madh i klubit prishtinas, është zgjedhur president duke i blerë 80 përqind të aksioneve.
Remzi Ejupi zyrtarisht ka dhënë dorëheqje nga pozita e presidentit duke shitur aksionet te Haradini, ky i fundit do ta drejtojë klubin më të madh në vendin tonë.
Ejupi ishte në krye të Prishtinës për gati dy dekada.
E mori drejtimin në vitin 2004. Gjatë kësaj periudhe, klubi i Prishtinës ka fituar më së shumti trofe në futbollin kosovar.
Ka fituar pesë tituj kampioni, gjashtë Kupa të Kosovës dhe pesë vjet ka garuar në Evropë.
Për kontributin e jashtëzakonshëm për këto dy dekada, Remzi Ejupin klubi prishtinas e shpalli president nderi.
Ejupi do të kujtohet si presidenti më i suksesshëm në futbollin kosovar dhe njëri prej donatorëve dhe kontribuuesve më të mëdhenj në futbollin e këtushëm.
