Juventus-Milan, nuk ka qenë, nuk është dhe nuk do të jetë kurrsesi një ndeshje e zakonshme në Itali.
Përtej momentit të dobët të dy skuadrave, përballja mbetet një klasike e madhe e futbollit italian me interes të jashtëzakonshëm jo vetëm në Itali por në mbarë botën.
Bëhet fjalë për dy prej klubeve më të mëdha të Evropës të cilat bashkë me Interin kanë dominuar futbollin italian ndër dekada.
Sot bardhezinjtë dhe kuqezinjtë përplasen në sfidën e vlefshme për javën e 22 të serisë A, ndeshje e cila ndryshe nga tradita nuk është një derbi që luhet për titullin, por ka rëndësi të madhe për garën e zonës Champions.
Zonja e Vjetër ka 34 pikë në klasifikim, dhe është në vendin e pestë, ndërsa Milani ndjek me 31 pikë, në vendin e shtatë.
Bardhezinjtë janë të pamposhtur në kampin, i vetmi ekip që nuk është mundur me 7 fitore dhe 13 barazime, ku spikat edhe ai në San Siro në fazën e parë ndaj Milanit 0 me 0.
Megjithatë fakti që nuk janë mundur asnjëherë nuk i ka shërbyer skuadrës së Tiago Motës për të qenë në zonën e sipërme të klasifikimit.
Nga ana tjetër Milani ka patur shumë luhatje në pjesën e parë të sezonit, të cilat çuan në shkarkimin e trajnerit Fonseka, më teknikun e ri portugez Konseisao skuadra arriti ta mposhti Juventusin 2 me 1 me përmbysje në gjysmëfinalen e superkupës së Italisë pak ditë më parë.
Në mesjavë në duelet e prapambetura Juventus doli me një pikë nga supersfida me Atalantën dhe synon të rigjejë fitoren në klasiken ndaj Milanit në shtëpi, teksa mendja është ndërkohë edhe tek merkato, ku erdhi mbrojtësi Alberto Kosta, por u stopua të paktën për momentin prezantimi i sulmuesit Kolo Muani nga PSG.
Sulmi në fakt është shqetësimi kryesor i Tiago Motës pasi Duhasn Vlahovic vazhdon të jetë i dëmtuar ndonëse sot do të jetë në stol, duke bërë që të luajë sërish në një pozicion jo natyral në majë të sulmit Niko Gonzales.
Tjetër mungesë e rëndësishme është edhe Konseisao, pa lënë mënjanë edhe Bremer, Milik dhe Danilo.
Nga ana tjetër tek Milani problem kryesor është mungesa e Pulisic i dëmtuar ndaj Komos, pa lënë mënjanë edhe Moratë, ish sulmues i Juventusit, i cili është i pezulluar.
Të tjerë lojtarë të padisponueshëm janë Cukueze dhe Malik Cau. Në fushë si titullar Abraham dhe Benaser. Supersfida luhet në Torino në orën 18:00 dhe transmetohet vetëm në platformën Tring./vizionplus.tv
