“Të jesh në gjysmëfinalet e një Kupe Bote është jashtëzakonisht e vështirë. Të gjithë rivalët janë shumë të fortë, dhe si ekip, ne jemi shumë të fuqishëm. Rruga drejt finales është e hapur plotësisht”. Kjo është deklarata e trajnerit të Spanjës, Luis de la Fuente, përpara ndeshjes kundër Francës, e cila do të përcaktojë se kush do të kualifikohet për raundin final të Kupës së Botës.
Në një intervistë me Cadena Ser, trajneri e quajti ekipin kombëtar Bleus një nga kandidatët për titullin, duke theksuar se të dy ekipet janë përmirësuar krahasuar me takimet e mëparshme dhe se ndeshja nuk do të ketë të bëjë fare me të kaluarën. Duke folur për Lamine Yamal, De la Fuente tha se ishte i bindur se “ndeshja e tij më e mirë në këtë Kupë Bote nuk ka ardhur ende”. “Ai është tepër i motivuar, është shumë i etur, thjesht duhet ta frenojmë pak ankthin e tij. Ai po kalon nëpër një proces natyror rritjeje dhe pjekurie”, vuri në dukje ai.
Trajneri më pas vlerësoi kapitenin Rodri, duke e quajtur atë “një lojtar shumë të rëndësishëm, pikën qendrore të të gjithë ekipit dhe më të mirin në botë në pozicionin e tij”, ndërsa theksoi gjithashtu vlerën e mesfushorëve si Pedri, Fabian Ruiz dhe Zubimendi. Lidhur me të dëmtuarit Nico Ëilliams dhe Victor Munoz, De la Fuente siguroi se “ata janë në gjendje të përsosur”, duke sugjeruar se mund të gjejnë minuta kundër Francës.
