Pas fitores ndaj Sitit që ka dhënë shumë entuziazëm në kampin bardhezi, Juventusi rikthehet të luajë në kampionat, aty ku presin në shtëpi Venecian.
Pas barazimeve zhgënjyese, bardhezinjtë kërkojnë të rikthehen te fitorja dhe Mota është “i detyruar” të kërkojë vetëm tre pikët.
Në prag të kësaj sfide trajneri dha edhe konferencën për shtyp, edhe pse nuk do të jetë ai që do të ulet në stol ndaj Venecias për shkak të pezullimit, por zëvendësi i tij Aleksandër Hygë.
“Pas fitores ndaj Sitit janë të gjithë mirë fizikisht dhe mendërisht. Padyshim që fitorja ndihmon, por grupi është i fokusuar te sfida e radhës, si gjithmonë.
Ndeshja kundër Venecias? Qasja jonë është gjithmonë e njëjtë. Ne kemi gjithmonë të njëjtin respekt për kundërshtarët tanë dhe me idenë për të hyrë në fushë dhe për të dhënë më të mirën tonë me përulësi dhe seriozitet. Ne duhet të luajmë një ndeshje të madhe. Lojtarët e dinë se çfarë duhet të bëjnë”, deklaroi tekniku i bardhezinjve.
