Derbi i Milanos sot është mbyllur me një sukses të thellë 5-1 të Interit, ku protagonist u bë edhe Davide Fratesi. Mesfushori i talentuar i është bashkuar zikaltërve si një armë më shumë në fazën ofensive dhe ai e tregoi këtë me golin e shënuar në derbi, duke vulosur suksesin 5-1 të ekipit të tij.
E megjithatë, në rrjet nuk flitet aq shumë për golin, sa për gjestin vetëm pak sekonda para shënimit të tij. Pikërisht 30 sekonda para se të tundte rrjetën, ai kishte një duel me Kruniç dhe kërkoi faull nga gjyqtari, Ky i fundit vazhdoi lojën ndërsa mesfushori i Milanit i tha diçka atij të Interit. Fratesi iu kthye dhe i bëri me shenjë që të pushonte dhe më pas i tregoi katër gishtat sa golat që ishin shënuar deri në ato momente.
Një veprim i cili të gjithëve u ka kujtuar atë të famshëm të Totit në ndeshjen Roma-Juventus kur verdhekuqtë triumfonin 4-0. Ai ia bëri një gjë të tillë Tudor në minutat e fundit të ndeshjes së luajtur në vitin 2004. “4 dhe në shtëpi”, ishte mesazhi i Totit, të cilin Fratesi i lindur në Romë kushedi se sa herë e ka parë që i vogël.
PANORAMASPORT.AL
