Mesfushori shqiptar dhe kapiteni i Zvicrës, Granit Xhaka ka folur për mediat pas eliminimit të kombëtares së tij nga Euro 2024.
Zvicra u eliminua sonte në çerekfinale të Kampionatit Evropian Euro 2024 nga Anglia në penallti.
Xhaka pas ndeshjes tha se Zvicra nuk e meritonte eliminimin në këtë mënyrë, por që “Helvetikët” duhet të jenë krenarë me veten e tyre.
“Ndjenja fillestare është trishtim dhe zhgënjim, sepse nuk e meritonim të humbnim kështu. Nga ana tjetër, ne mund të jemi krenarë për veten tonë. Nga ndeshja e parë e deri më sot, ne vazhduam të përmirësoheshim dhe treguam karakter të madh, shpirt të madh ekipor dhe gjithmonë i thoshim vetes ‘të na mundin, do të duhet shumë‘”, tha Xhaka.
Xhaka foli edhe për mbështetjen që Zvicra ka marrë nga tifozët e saj në EURO 2024.
“E pamë mbështetjen në stadium, e pamë mbështetjen në rrjetet sociale dhe në Zvicër. Për ne ishte shumë e rëndësishme t’u kthenim diçka. Unë mendoj se ne u kthyem atyre shumë më tepër sesa pritej”, tha më tej Xhaka.
