Te Spanja presin më të mirën nga sulmuesi i krahut, Lamine Yamal, në ndeshjen kundër Austrisë në 1/16 e finales të Kupës së Botës.
Spanja ka udhëtuar për në Los Angeles për ndeshjen kundër Austrisë, e cila zhvillohet të enjten nga ora 21:00.
E vlerësuar si një nga favoritet për Kupën e Botës, Spanja u kualifikua si e para e Grupit H. Por nuk tregoi shumë në ndeshjet kundër Kepit të Gjelbër dhe Uruguait, ndërsa Yamal ka qenë duke u munduar ta kthejë formën më të mirë pas rikuperimit nga lëndimi.
Yamal luajti vetëm 19 minuta kundër Kepit të Gjelbër, 45 minuta kundër Arabisë Saudite dhe pastaj 76 minuta kundër Uruguait.
Yamal ka shënuar një gol deri më tani. Por pritjet nga spanjollët janë më të mëdha nga superylli i Barcelonës.
Te Spanja e shohin ndeshjen ndaj Austrisë si mundësi të artë për shkëlqimin e Yamalit.
Kampionia në fuqi e Evropës ka humbur dy ndeshje në fazat nokaut të Kupës së Botës që nga triumfi në vitin 2010. Por spanjollët nuk kanë pësuar asnjëherë tre humbje rresht në fazën nokaut të Kupës së Botës.
Austria e siguroi vendin e dytë në Grupin J pas barazimit 3:3 kundër Algjerisë, në ndeshjen e fundit të fazës së grupeve.
Spanja është e pamposhtur në pesë ndeshjet e fundit ndaj Austrisë.
Austriakët kanë një fitore 2:1 ndaj Spanjës në Kupën e Botës të vitit 1978.
