Oleksandr Zinchenko ka bërë një pohim delikat se Pep Guardiola di të reagojë në situata më mirë se Mikel Arteta.
Gjatë një paraqitjeje në podcastin e The Athletic’s Handbrake Off, mbrojtësi i Arsenalit u pyet për dallimet dhe ngjashmëritë midis Guardiolës dhe Artetës.
Zinchenko, i cili ka pasur privilegjin të luajë nën drejtimin e të dy trajnerëve, u përgjigj pa hezitim.
“Të dyve u pëlqen të fitojnë. Ata thjesht do të japin gjithçka për të fituar ndeshjen, nuk ka rëndësi se cila garë është, miqësore apo çfarëdo, të dy i kushtojnë vëmendje detajeve të vogla”, ka thënë fillimisht Zinchenko.
“Sigurisht, Pep Guardiola ka më shumë përvojë, ai ka punuar me klube të mëdha në të kaluarën dhe kur ke përvojë, i sheh situatat mijëra herë dhe di si të reagosh ndaj secilës”.
“Nuk po them që Mikel nuk e di, sigurisht, ai di si të reagojë ndaj situatave, por gjithçka ka të bëjë me përvojën”.
“Unë mendoj se ky është ndryshimi kryesor midis tyre, por jam i sigurt se Mikel do të ketë trashëgiminë e tij me siguri dhe një të ardhme të mrekullueshme”, përfundoi ukrainasi.
Arteta është kritikuar shpesh për reagimet e tij shpërthyese në fushë, veçanërisht kur gjërat nuk shkojnë ashtu siç duhet për Arsenalin.
Sidoqoftë, mentaliteti i tij fitues dhe vëmendja ndaj detajeve më të imta janë gjëra që ai i ka zgjedhur qartë nga Guardiola ndërsa punonte si ndihmës trajneri i tij te Manchester City.
