Verona pësoi humbjen e shtatë në 11 javë të Serie A teksa u mposht në shtëpi përballë Monzës me shifrat 1-3.
Miqtë i nderoi sulmuesi në pronësinë e Milan, Lorenzo Colombo që shënoi një dygolësh. Ishte pikërisht 21-vjeçari që zhbllokoi shifrat në minutën e 41-të pas një asisti të Colpanit.
Në fraksionin e dytë, italiani gjeti sërish rrugën e rrjetës, këtë herë në minutën e 73 me anë të një goditje shumë të bukur në hyrje të zonës.
Një gol që u krijua i gjithi vetë nga Colombo. Në të 84-tën, Monza shënoi edhe të tretin me anë të Caldirolës për të siguruar tre pikët, edhe pse Verona provoi të rihapte ndeshjen falë golit të Folorunsho.
Por, ishte një gol që shërbeu sa për statistikë. Kështu, pas dy ndeshjes, Monza rikthehet te fitorja dhe ngjitet në kuotën e 16 pikëve në vend të tetë ndërsa nga ana tjetër, Verona pësoi të katërtën humbje radhazi dhe mbetet në vend të 17 me tetë pikë.
