Raundi i nëntë i Superligës së Kosovës nisi me ndeshjen Gjilani – Ferizaj, e mbyll me fitoren 2-1 të mysafirëve.
Që në minutat e parë skuadra e Ferizajt tregoi se nuk kishte ardhur në Gjilan për shëtitje, duke rrezikuar portën e Kenan Haxhihamzës në disa raste.
Për golin e epërsisë u përkujdes Edon Sadriu, i cili në minutën e 15-të shënoi për rezultatin 1-0 pas një aksioni të bukur të ferizajasve.
Pak minuta para se gjyqtari të sinjalizonte për përfundimin e pjesës së parë, Ferizaj gjeti edhe golin e dytë, këtë herë me anë të Abdul.
Avantazhi prej dy golave nuk e zmbrapsi aspak Ferizajn, që në minutën e 50-të tundi edhe një herë tjetër rrjetën me Edon Sadriun, por goli u anulua nga VAR-i për ndërhyrje të palejuar gjatë ndërtimit të aksionit.
Vendasit arritën që të shënonin me anë të Senad Jarovic në minutën e 71-të për rezultatin përfundimtar 2-1.
Të besuarit e Ardian Nuhiut e mbyllën ndeshjen me nëntë lojtarë në fushë pas përjashtimit me karton të kuq të Jamal Aragos dhe Besir Ramadanit.
Pas javës së nëntë Gjilani zbret në pozitën e tetë me nëntë pikë, teksa Ferizaj tashmë ka marrë vendin e shtatë me 10 pikë.
