Napoli nuk fal përballë Verona-s, triumfon me rezultatin 2-0 duke ruajtur provizorisht pozitat në krye të Serie A. Në “Maradona”, ekipi i Conte-s zgjidhi gjithçka me nga një gol për çdo pjesë.
Pas vetëm 5 minutash, kapiteni Di Lorenzo lëshoi një të majtë shumë të bukur, topi u përplas fillimisht në shtyllën pingule, për t’u devijuar në rrjetë nga portieri i Verona-s, për fatin e keq të kapitenin u konsiderua autogol. Napoli nuk e uli ritmin, por nuk arritën të gjenin prekjen fituese në zonë.
Me fillimin e pjesës së dytë ishte Anguissa që me një predhë të vërtetë dyfishoi shifrat duke hipotekuar këtë fitore që e vendos Napolin në pozita komode, në kuotën e 47 pikëve, 4 më shumë se sa Inter, por zikaltërit kanë dy ndeshje më pak.
“Sërish ata, Conte dhe Inter me ritëm titulli”, shkruan La Gazzetta dello Sport në faqen e parë.
Pavarësisht fitores, pas ndeshjes, interesimi më i madh i gazetarëve ishte në lidhje me të ardhmen e Kvaratskhelia, por Conte theksoi se nuk ka asgjë të mbyllur, nuk është e thënë që sulmuesi gjeorgjian do të transferohet te PSG gjatë janarit.
Fiton Napoli, por ngec Roma. Pas suksesit në derbit, ekipi i Ranierit nuk shkoi më shumë se një barazim 2-2 në transfertë përballë Bologna-s, madje ishin dhe më fat që dolën me një pikë pasi goli i barazimit erdhi në frymën e fundit, në minutën e 98-të, me Dovbyk që u tregua i saktë nga pika e bardhë e penalltisë.
