Dita e dytë e kampit stërvitor me futbollistët kandidatë potencial për Kombëtaren A në stadiumin “Fadil Vokrri” në Prishtinë, u zhvillua me intensitet dhe angazhim maksimal të lojtarëve.
Seancën stërvitore të mbajtur të hënën, e udhëhoqi selektori i Kombëtares A, Franco Foda, i cili nuk ishte i pranishëm në ditën e parë për çështje shëndetësore.
Në njoftimin e FFK-së, thuhet se Foda me vëmendje ndoqi performancën e futbollistëve që i ka ftuar në këtë kamp stërvitor.
Pas përfundimit të stërvitjes, disa prej lojtarëve ndanë përjetimet dhe emocionet nga dy ditët e para të këtij kampi stërvitor.
Leon Zeqiraj, i cili është pjesë e ekipit U20 të Sampdorias, u shpreh i emocionuar për mundësinë që të tregoj cilësitë e tij para stafit teknik të Kombëtares A.
Dion Gallapeni i skuadrës së Prishtinës, shtoi se ky kamp stërvitor është hap i rëndësishëm për të kuptuar filozofinë e lojës së trajnerit.
Ndërkohë, Luan Lleshi i Feronikelit ’74, u shpreh krenar që i është dhënë mundësi të jetë pjesë e këtij kampi.
Seanca e radhës stërvitore, do të zhvillohet të martën prej orës 11:00 në stadiumin “Fadil Vokrri”.
Ky kamp stërvitor prej katër ditësh, ka nisur të dielën dhe do të përfundoj të mërkurën.
