Kosova do t’i organizojë Lojërat Mesdhetare në vitin 2030. Pjesë e programit të Lojërave Mesdhetare “Prishtina 2030” është përfshirë edhe futsalli.
Kështu ka njoftuar të hënën Komiteti Olimpik i Kosovës. Sipas KOK-ut, vendimi është marrë nga Komiteti Ekzekutiv i Komitetit Ndërkombëtar të Lojërave Mesëdhetare në mbledhjen e mbajtur në Ljubljanë të Sllovenisë.
“Pas diskutimeve produktive me FIFA-n, ICMG ka konfirmuar përfshirjen e futsallit si për meshkuj, ashtu edhe për femra, në programin zyrtar të sporteve të LM që do të mbahen në Prishtinë në vitin 2030. Futsalli do të zëvendësojë zyrtarisht futbollin U21”, thuhet në vendimin e ICMG, shkruan KOK-u.
Në Kosovë, futsalli përcillet me shumë interesim. Ka skuadra mirë të organizuara, ndërsa nuk mungojnë edhe lojtarë të dëshmuar.
Më 8 shtator të vitit 2023, në Heraklion të Greqisë, u vendos që Lojërat Mesdhetare të vitit 2030 të mbahen në Prishtinë.
Është kjo ngjarja dukshëm më e madhe sportive që do të organizohet në Kosovë. Punët në infrastrukturë dhe në fusha të tjera vlerësohet se do të jenë të mëdha që Prishtina e Kosova të jenë gati për të pritur mijëra sportistë nga shumë vende rreth Mesdheut.
