Alvaro Morata është distancuar nga çështja e basteve të paligjshme në Itali.
Sulmuesi spanjoll, ish-lojtar i Milanit dhe aktualisht te Galatasaray, ishte përmendur në disa hetime të bisedave të Nicolo Fagiolit, i cili ka reaguar për lajmet e fundit në rrjetet sociale.
Në veçanti, në një bisedë me ish-shokun e skuadrës në ekipet e moshave, Zanandrea (sot te Fiorentina), ish-mesfushori i Juventusit fliste për një “Alvaro”, që e ndihmonte në blerjen dhe shitjen e orëve, mjet për të fshehur borxhet nga lojërat e fatit.
Një rol që Morata, emri i të cilit, për më tepër, nuk figuron në procesverbalet e prokurorisë, e mohon kategorikisht: “Kam parë informacionet që po qarkullojnë për mua dhe dua të sqaroj se e vetmja gjë në të cilën e kam ndihmuar Fagiolin këto vite ka qenë t’i jap këshilla për karrierën e tij, si mik dhe si person me më shumë përvojë se ai.
Nuk kam ditur kurrë asgjë për situatën e tij.
E dua shumë Nicolon dhe shpresoj që të mund t’i përmirësojë sa më shpejt të gjitha gabimet e tij, por unë nuk kam të bëj fare me këtë çështje dhe ju lutem të mos përhapni lajme të rreme apo gënjeshtra.
E përsëris: i mohoj të gjitha informacionet që kanë dalë, sepse janë të rreme. Faleminderit!”.
