Empoli do të tentojë të marrë pikën e parë për këtë sezon të Serisë A dhe do ta bëjë këtë as më pak e as më shumë se ndaj Interit. Pas disfatës së thellë prej 7 golash të pësuar fundjavën e shkuar kundër Romës, Etrit Berisha dhe Ardian Ismajli shpresojnë të kthejnë faqe dhe të arrijnë të ndalin në shtëpinë e tyre ofensivën zikaltër.
Në stol është rikthyer Aurelio Andreacoli, të cilin Ismajli e njeh mirë, i cili do të kërkojë të fitojë ndeshjen e parë të tij në këtë eksperiencë të dytë me toskanët.
Në krahun tjetër, shqiptarët e Empolit do të kenë përballë Kristjan Asllanin, një “ish” të sfidës. Edhe pse ishte favorit për ta nisur titullar, elbasanasi pritet ta nisë nga stoli, pas rikuperimit të Hakan Çalhanoglut.
Turku e ka lënë pas lodhjen muskulore dhe është gati të vendoset në dispozicion të Inzagit për të qenë në fushë nga minuta e parë. Një tjetër ndryshim pritet të prekë mesfushën, aty ku Mikhitarian pritet t’i lërë vendin Fratezit, me Turamin dhe Lautaron që do të rikthehen të jenë dyshja e sulmit.
PANORAMASPORT.AL
