AC Milan po monitoron nga afër situatën e mbrojtësit të Manchester United, Leny Yoro, teksa e ardhmja e francezit në “Old Trafford” ka nisur të ngrejë pikëpyetje.
Sipas raportimeve të fundit nga “Daily Briefing”, Manchester United është në kërkim të një tjetër mbrojtësi qendror, ndërsa një prej emrave që po shqyrtohet është Jacobo Ramon i Comos. Kjo lëvizje lidhet edhe me shqetësimet për rolin që Yoro ka aktualisht në skuadër.
20-vjeçari francez nuk po gëzon një rol të rregullt në formacion dhe, sipas burimeve të cituara nga raporti, situata pritet të diskutohet së shpejti me lojtarin. Nëse minutazhi i tij nuk rritet, Yoro mund të jetë i gatshëm të shqyrtojë oferta nga klubet e tjera, transmeton ORAinfo.
Në garë për mbrojtësin raportohet se është edhe Paris Saint-Germain, që e ka ndjekur prej kohësh, ndërsa Arsenal mund të jetë një tjetër destinacion i mundshëm nga Premier League.
Real Madridi, i cili më parë ishte lidhur fuqishëm me Yoron, për momentin duket se është tërhequr nga gara. Ndërkohë, Chelsea, Barcelona dhe AC Milan përmenden si klube që e kanë admiruar prej kohësh talentin francez.
Milan e kishte në radar Yoron edhe gjatë merkatos së verës, kur kuqezinjtë kërkonin një tjetër qendërmbrojtës, megjithëse në atë periudhë nuk pati një interes konkret.
Një faktor që mund të ndikojë në një transferim të mundshëm është edhe marrëdhënia e Yoros me agjentin e tij, Jorge Mendes. Përfaqësuesi portugez ka një rol të rëndësishëm në tregun europian dhe ka pasur kontakte edhe me drejtuesit e Milanit.
Megjithatë, nga Manchester United vazhdojnë të dalin sinjale se klubi nuk e konsideron largimin e Yoros si një skenar të afërt. Mbrojtësi shihet ende si një lojtar që mund të rikthehet në formacion dhe të fitojë vendin e tij në ekipin e drejtuar nga Michael Carrick.
Situata mund të bëhet më interesante nëse Manchester United transferon një tjetër qendërmbrojtës dhe Yoro vazhdon të ketë vështirësi për të siguruar minuta. Në këtë rast, merkatoja e dimrit mund të sjellë zhvillime të reja për të ardhmen e francezit. /ORAinfo/
