Bisedimet mes Ralf Ragnik dhe Bajern Mynih kanë hyrë në fazë “të nxehtë” dhe shumë shpejt pritet që të ndodh zyrtarizimi i tratativave. Prestigjozja “Bild” shkon më tej, duke nxjerrë në dritë edhe kushtet e kontratës, të cilat vënë në dukje sesa i rëndësishëm është 65-vjeçari në planet e klubit më të titullar në Gjermani.
KUSHTET – “Bild” raporton se kontrata do të jetë 2- vjeçare, me opsion edhe për një vit zgjatjeje, çka nënkupton se Ragnik do të qëndrojë në Mynih minimalisht deri në verën e vitit 2026. Panorama në fjalë paraqet planin serioz me ish-teknikun e Mançester Junajtidit. Por kjo nuk është e gjitha. Drejtori sportiv Kristof Frojnd dhe Shefi Jan-Kristian Dresen kanë përdorur metodën e “tundimit” për ta bindur “timonierin” e përfaqësueses austriake.
PREMTIMI – Në propozimet që i janë prezantuar Ralfit, ceket edhe dora e lirë në tregun e transferimeve. Tomas Tuhel e ka vuajtur këtë detaji, sikurse Nagelsman. Ragnik kërkon të bëjë ligjin në Mynih në çdo drejtim. Pushteti që bordi i ka servirur një trajner pa eksperiencë të mjaftueshme dhe pa tituj të rëndësishëm në Europë ka shfaqur habi te mediat ndërkombëtare. Fansat e Bajern Mynih e kanë shprehur hapur qëndrimin e tyre, kundër zbarkimit të Ralf Ragnik në “Allianz Arena”, madje duke shkuar deri në peticion publik.
LIRIMI NGA AUSTRIA – Përfaqësuesja e Austrisë është e lidhur me ish-trajnerin e Lajpcig deri në vitin 2026, çka do të thotë se bavarezët duhet të paguajnë disa mln euro në arkat e federatës që ka lidhje aktive me Ragnik. Aludohet për 2-3 mln euro. Nëse marrim në konsideratë klauzolën e Nagelsmanit në verën e vitit 2021 ku depozituan 25 mln euro në adresim të Lajpcig, për lirimin e Julianit, kuota në fjalë merr ngjyrime të papërfillshme.
SAIMIR MBËRSI-PANORAMASPORT.AL
